Dómsmál

Ýmsum spurningum enn ósvarað

20131023_144330

Reykjavík vikublað fjallar ítarlega um dóm Hæstaréttar yfir níumenningunum sem sættu ákæru fyrir að vilja standa vörð um náttúruperlur í Gálgahrauni og voru handteknir ásamt fjölda annarra í viðamiklum og þrautskipulögðum aðgerðum lögreglu þann 21. október 2013.

Ingimar Karl Helgason ritstjóri fjallar um málið í leiðara.  Þar segir m.a.

Enda þótt hér hafi Hraunavinir sannarlega unnið sigur, þá er hér hópur fólks sem hefur þurft að glíma við handtöku, ákærur og dóma um margra mánaða skeið. Og fyrir hvað? Fyrir að sitja á rassinum fyrir íslenska náttúru.

Því hefur ekki enn verið svarað hvernig á því stóð að allir þessir lögreglumenn voru staddir í Hrauninu þennan morgun. Lögreglumenn kunna jafnvel að hafa verið fleiri en þau sem söfnuðust saman snemma dags til friðsamlegra mótmæla.

Leiðara Ingimars, Dagsform og duttlungar, má lesa í heild sinni hér:

https://rvkv.wordpress.com/2015/05/30/dagsform-og-duttlungar/

Umfjöllun blaðsins má sjá hér:

https://rvkv.wordpress.com/2015/05/30/nyr-tonn-i-natturuverndarmalum/

Dómsmál

Dómar Hæstaréttar í máli Hraunavina

9mdv

Hæstiréttur hefur nú fellt dóma í máli níu Hraunavina sem ákærðir voru fyrir að hafa óhlýðnast fyrirmælum lögreglu og neitað að færa sig um set við mótmæli gegn lagningu nýs Álftanesvegar um Gálgahraun 21. október 2013.  Rétturinn frestar ákvörðun refsingar, sem fellur niður haldi ákærðu almennt skilorð í tvö ár.  Héraðsdómur Reykjaness hafði áður dæmt ákærðu til sektargreiðslu og fangelsisvistar til vara.

Varðstaða um náttúrverðmæti viðurkennd

Hæstiréttur vísar m.a. til ákvæða stjórnarskrár um tjáningarfrelsi og rétt manna til mótmæla.  Ennfremur er litið til þes að tilgangur mótmælanna hafi verið að standa vörð um náttúruverðmæti.  Segir svo í dómunum:

Við ákvörðun refsingar ákærðu verður litið til þess að hún hefur ekki áður hlotið refsingu, að fyrir henni vakti að standa vörð um náttúruverðmæti, sem hún og fleiri töldu að verið væri að vinna óbætanlegan skaða, og að það gerði hún með því að nýta á friðsaman hátt stjórnarskrárvarinn rétt sinn til að mótmæla þó svo að í þessu tilviki hafi hún gengið lengra en heimilt var.

Þótt dómar Hæstaréttar komi ekki í veg fyrir að lögregla geti að eigin geðþótta misbeitt 19. grein lögreglulaga þá ber engu að síður að fagna því að þeir hafi verið mildaðir að verulegu leyti og ákvörðun refsingar frestað.  Einnfremur er mikilvægt að Hæstiréttur líti sérstaklega til þess að fyrir ákærðu hafi vakað að standa vörð um náttúruverðmæti.  Hlýtur það að verða náttúruverndarsinnum hvatning að láta hvergi deigan síga í þeirri baráttu sem vænta má um náttúru Íslands í náinni framtíð.

Dómarnir eru samhljóða.  Þá má lesa þá í heild sinni á vef Hæstaréttar.  Sjá dæmi hér:

http://haestirettur.is/domar?nr=10480

(Mynd fengin af vef dv.is)

Dómsmál

Níumenningarnir fyrir Hæstarétti

9menningar

Fimmtudaginn 21. maí kl. 9:00 verður málfutningur máli þeirra níu sem ákærð voru fyrir að sitja kyrr í Gálgahrauni 21. okt. 2013, þegar lögreglan fyrirskipaði að fólk „færði sig um set“.

Þetta mál fjallar um svo margt fleira en níumenningana. Það fjallar um rétt okkar til friðsamra mótmæla og að vernda náttúruna.Réttarhaldið er opið svo allir sem áhuga hafa geta komið og fylgst með. 21.05 – kl. 9:00 – Hæstiréttur – Dómsalur II.

Skúli Bjarnason lögfræðingur okkar mun flytja málið.
Stjórn Hraunavina.
Málefni

Athugasemdir Hraunavina vegna Suðurnesjalínu 2

Hraunavinir mótmæla harðlega fyrirætlunum Landsnets um lagningu Suðurnesjalínu 2 í loftlínum í gegnum Vallahverfið í Hafnarfirði og í gegnum ósnortin hraunsvæði í Almenningi. Einnig er mótmælt byggingu tengivirkis í Hrauntungum. Hraunavinir fara því fram á að Hafnarfjörður veiti Landsneti ekki framkvæmdaleyfi fyrir Suðurnesjalínu 2 að óbreyttu.

Sjá bréf stjórnar Hraunavina til skipulags- og byggingarsviðs Hafnarfjarðar 4. apríl 2015 í pdf viðhengi.

Athugasemdir Hraunavina vegna Suðurnesjalínu 2

Félagsstarf

Aðalfundur Hraunavina 2014

Hraunavinir_merki_meðfánaAðalfundur Hraunavina var haldinn í Gaflaraleikhúsinu að morgni laugardagsins 1. nóvember. Félagið hefur látið mikið að sér kveða undanfarna mánuði og mikið mætt á einstökum félagsmönnum sem kunnugt er. Ragnheiður Elfa Þorsteinsdóttir héraðsdómslögmaður greindi frá stöðu mála. Tónleikar sem efnt var til í Háskólabíói miðvikudaginn 29. október voru vel heppnaðir og greinilegt að íslenskst listafólk lætur sig málefni félagsins skipta. Staða mála var rædd og farið yfir liðið starfsár sem er það viðburðaríkasta í sögu félagsins. Jafnframt var nýtt merki félagsins sem Gunnar Júlíusson hannaði kynnt og samþykkt á fundinum.

Ný stjórn kosin sem er skipuð eftirfarandi aðilum:

Aðalstjórn:

Gunnar Örvarsson

Gunnsteinn Ólafsson

Kristinn Guðmundsson

Margrét Pétursdóttir

Ragnhildur Jónsdóttir

Varamenn eru:

Ragna Dagbjört Davíðsdóttir

Ragnar Unnarsson

Fráfarandi stjórnarfólki var sérstaklega þakkað fyrir að standa vaktina og nýir stjórnarmenn boðnir velkomnir til starfa. Stjórnin mun skipta með sér verkum á fyrsta stjórnarfundi.

Gerðar voru breytingar á lögum félagsins. Lögin eru birt á öðrum stað.

 

Félagsstarf

Gálgaprjón 19. júní 2014

Gálgaprjón verður í Gálgahrauni fimmtudaginn 19. júní kl. 20.00 hjá  Ófeigskirkju. 
Allir sem vilja minnast viðburðanna 21. október 2013 eru velkomnir jafnt prjónandi og óprjónandi. 
Trefillinn verður mældur á ný því enn hafa bæst í hann bútar. 

 

 
 

Félagsstarf

Göngu í kvöld frestað vegna rigningar

Ganga sem Hraunvinir ætluðu að efna til í nyrsta hluta Búrfellshrauns miðvikudaginn 4. júní fellur niður að sinni vegna rigningar. Gangan verður farin síðar og nánari upplýsingar settar inn á síðuna þegar þar að kemur.

Félagsstarf

Fyrsta gönguferð af fjórum, miðvikudaginn 4. júní 2014

Hraunavinir standa fyrir fjórum gönguferðum um Búrfellshraun, frá fjöru til fjalls í sumar. Fyrsta gangan hefst við Garðastekk við miðjan Álftanesveg. Gengið verður hringleið þannig að best er að leggja bifreiðum við upplýsingaskiltið við Garðastekk. Lagt verður af stað kl. 20:00 miðvikudagskvöldið 4. júní frá Garðastekk.

Fyrsti áfanginn miðast við að ganga frá Garðastekk að Kjarvalskletti, þaðan að Ófeigskirkju og síðan verður stefnan tekin á Gálgakletta. Göngufólk skiptist á að miðla af þekkingu sinni og fróðleik.

Næsta ganga verður að kvöldi þriðjudags 10. júní, sem er fyrsti hvunndagurinn eftir Hvítasunnu. Gengið verður um hraunið milli i Garðabæjar og Hafnarfjarðar, sem á korti nefnt Hafnarfjarðarhraun, en hefur líka verið kallað Hraunsholtshraun.  Þar er margt áhrugavert að sjá, svo sem minjar um búsetu, myndarlega hraundranga, fjölbreyttan gróður og sitthvað fleira.    

Seinni göngurnar tvær hafa ekki verið dagsettar en tilkynnt verður um þær þegar nær dregur.

Hraunavinir og aðrir sem hafa áhuag á að slást í för mæta miðvikudaginn  4. júní, kl. 20:00 við Garðastekk.

 

 

Greinar Hraun Málefni

Íslensk ónáttúra

Ákveðið hefur verið að falla frá öllum málarekstri vegna vegalagningar í Gálgahrauni. Vegagerðin hóf með lögregluvaldi óafturkræf spjöll á hrauninu eftir að dómsmál þar sem tekist var á um lögmæti framkvæmdanna var höfðað og hefur haldið þeim áfram síðan.  Óbætanlegt tjón er orðið staðreynd. read more »

Félagsstarf

Listaverkauppboð 8. febrúar 2014

Hópur myndlistamanna hefur gefið listaverk til að afla fjár fyrir baráttu Hraunavina og fleiri um verndun Gálgahrauns. Verkin verða boðin upp á sérstöku Listaverkauppboði laugardaginn 8. febrúar kl. 15. Uppboðið fer fram í Listhúsi Ófeigs Björnssonar að Skólavörðustíg 5 í Reykjavík kl. 15:00.

Verkin verða til sýnis í sýningarsal Listhúss Ófeigs frá og með kl. 15:00 laugardaginn 25. janúar og fram að uppboðsdegi á opnunartíma Listhússins. 

Ófeigur Björnsson rekur gullsmíðavinnustofu ásamt Listhúsinu og er opið á hefðbundnum verslunartíma kl. 10 til 18 og á laugardögum kl. 11 til 16. 

Tónlistarmenn stóðu að myndarlegum tónlistarviðburði sl. haust í Neskirkju til fjáröflunnar fyrir Hraunavini. Nú taka myndlistarmenn við keflinu.